上次阿史就同大家講「三姑六婆」分別係指邊啲人，今次就同大家介紹另外一個都有帶有貶義意思嘅詞語，就係「三教九流」。

就咁簡單從字面意思理解，呢個詞其實係講緊社會上宗教或者學術上嘅各種流派，亦都係指緊社會上嘅各行各業，但呢度就會對唔同嘅人進行社會地位嘅劃分，本來就冇貶義嘅意思，但一到實際應用，特別喺古代嘅小說入面，就會有貶義。

先講最易理解嘅「三教」，就係指緊三大傳統宗教「儒教」、「道教」、「釋教」（即係佛教）。至於「九流」就比較繁複，一般就係按尊卑不同嘅九個身份，分別係帝王、文士、官吏、醫卜、僧道、士兵、農民、工匠、商賈，呢個就係「三教九流」入面嘅唔同身份。而對於社會上唔同人士，仲有「九流十家」同埋上、中、下九流嘅分法，有機會阿史會再同大家介紹下！

原圖嚟自網絡