呢排就同史友們講到「香蕉共和國」呢個名點樣嚟,而喺呢個名出現之前,當時嘅人對拉丁美洲曾經仲有另一個稱呼,就係叫做「山姆大叔的新果園」,到底又係因為乜嘢事呢?

要知道「香蕉共和國」其實係指一啲經濟命脈被美國聯合果品公司同埋標準果品公司控制嘅中美洲國家。早喺南北戰爭時期,美國人就好鍾意一樣熱帶水果,就係香蕉,但當時距離美國最近而又適合種香蕉嘅就係牙買加一帶。由於供不應求嘅關係,令到當時美國一位商人諗到一條計!

喺19世紀中後期,唔少美洲國家都想發展鐵路,1871年就有一位美國鐵路企業家亨利·梅格斯想喺哥斯大黎加鋪設由首都聖荷西到東部港口檸檬港嘅鐵路,最後佢係拎到99年嘅經營權並且連同鐵道周圍80萬英畝免稅土地種植香蕉,而事後發現呢啲香蕉所得嘅收入仲犀利過興建鐵路。

因為呢件事,令到亨利·梅格斯同埋佢個侄基斯一度全面壟斷中美洲香蕉事業,後來就因為經濟危機令到佢必需同佢嘅對手合併為聯合果品公司。自此以後,呢間公司就喺中美洲繼續擴張,喺巴拿馬、危地馬拉、洪都拉斯、哥倫比亞等等,開闢一個又一個香蕉園。

喺1899年,洛杉磯時報就將拉丁美洲稱呼做「山姆大叔的新果園」,自此就對拉丁洲持續掌控,仲曾經作出多次軍事干預。

原圖嚟自網絡