提到中國近代京劇昆劇嘅重要人物，「四大名旦」之一嘅梅蘭芳絕對係重要嘅代表，佢男扮女裝出神入化嘅表現，被認為係將原本通俗嘅戲劇，呈現到抒情境界；佢嘅梅腔更加令到人感受到餘韻，感受到古典女子優美嘅情致。

梅蘭芳1894年出生喺江蘇，佢嘅祖父就係當時京城出名嘅青衣花旦演員梅巧玲，年幼就跟隨戲班琴師學戲，年僅十歲就已經登台演出。講到佢一舉成名嘅作品，就係喺1913年上海演出嘅《穆柯寨》，梅蘭芳飾演穆桂英，同場以刀馬旦姿態塑造穆桂英青年形象以及飽經憂患嘅家庭婦女，當時憑住扮相、身段同埋唱念做打令到佢喺上海一炮而紅。

佢喺1919年就曾經訪問日本演出，亦都成為一時熱話，當時就有人提出「有此雙手，其餘女人的手盡可剁去」，認真誇張。後來梅蘭芳就一邊到各地演出，1924年就拜師齊白石學畫工蟲。而佢喺跟齊白石學畫嘅時候，亦都得到唔少珍貴嘅建議，就好似繼承優良傳統京劇嘅華麗身段，周時改善以往只重形式缺乏情感嘅表現，亦都因為後來注入情緒嘅演唱，令到梅派創立。

講到最轟動嘅一次演出，就係梅蘭芳72日內去過美國並喺西雅圖、芝加哥、華盛頓、紐約、舊金山等地演出。梅蘭芳當時真係舉世知名，就算去到日軍侵華期間，日偽政權曾經想佢演出，當時財困嘅梅蘭芳仍然不為所動，甚至刻意蓄鬚表示一刀兩斷，直到1945年之後先重返舞台。

1961年8月8日，梅蘭芳病逝於北京，結束佢傳奇嘅一生。

原圖嚟自網絡