尋日寫李登輝死訊個陣,話佢一生爭議多不勝數,原因好簡單,因為佢一生嘅「政治轉向」大多,引嚟唔少爭議。

之前都講過,佢少年時代係皇民化下嘅台灣島民,所以佢對日本有相當忠誠(响晚年時非常明顯),仲有個皇民名叫岩里政男。而响二戰後,本來响日本留學嘅佢從日本返咗台灣,有指佢仲加入咗共產黨,不過好快又退黨。响六十年代佢响美國學成歸台,得到蔣經國嘅賞識,佢唔單止加入左國民黨,扶搖直上,登上「總統」大位。不過响佢任內,就廢除國統綱領、廢除大陸代表嘅國大,台灣凍省廢省,都被唔少人視佢為暗搞「台獨」。而佢响1999年宣揚「兩國論」,就令兩岸關係跌至冰點。

2000年李登輝卸任後,就擺明車馬大搞「台獨」,成立台獨團結聯盟等台獨政黨,亦被國民黨踢出黨。亦因為佢「台獨」主張鮮明,所以成為主張「台獨」嘅政治人物巴結嘅對象,希望得到佢政治上嘅「祝福」,好似民進黨每次大小競選都希望得到佢嘅支持,不過有時佢又未必支持民進黨,好似佢曾經批評蔡英文嘅政治主張,又支持過柯文哲。簡單而言,佢諗乜佢想點,真係好難估。

原圖嚟自網絡