秦始皇帝陵園外城 發現九座貴族高等級墓葬

前排阿史就同史友們介紹過西安嘅兵馬俑同埋秦始皇帝陵園，而近日喺呢個咁重要嘅歷史遺址入面，考古學家又有一啲新發現！

近日陝西考古人員喺秦始皇帝陵園外城西側北部進行發掘，竟好罕有咁發現到九座「中字形」同埋「甲字形」古代貴族高等級墓葬，入面仲有唔少珍貴嘅陪葬品。呢批墓穴都有一個特點，就係內部嘅陪葬品都係一字排列而且好整齊，咁亦都意味住呢啲墓穴係經過悉心安排；而且喺位置上嚟睇，呢啲墓穴距離陵園外城就只有百幾米，即係墓穴主人同秦始皇有返咁上下關係。

可能有史友就比較關心，到底呢次發掘搵到啲乜？暫時嚟講專家就喺入面搵到大量陶器、銅器、玉器、少量金銀器、鐵器、青銅配件，仲有數以千計嘅銅錢等。當中講到最珍貴，就有金駱駝、金舞袖俑等，呢啲發現珍貴嘅地方在於佢哋印證住小型樂舞百戲俑同埋動物造型等嘅器物係一個作為隨葬品嘅先例。咁之後仲會有乜發現，阿史相當期待！