東華三院同保良局嘅故事大家應該聽唔少,但又知唔知佢哋發源地喺邊度?唔講真係未必知,原來呢兩間慈善機構最初都係喺一條有「墳墓街」之稱嘅普仁街起源!

普仁街位於中西區上環,鄰近東華醫院,喺19世紀中期佢仲有另外一個稱呼,係叫做「墳墓街」。點解會有呢個稱呼呢?開埠初期,港府係冇明文規定殯儀政策,雖然華人有一套殯儀嘅方式,但就冇明確嘅落葬地點。於是,當時普仁街嘅一個山坡就成為華人安葬先人嘅地點,亦都被華人廣泛稱呼做「墳墓街」。

「墳墓街」所在嘅上環,亦都係開埠初期華人聚居地,生活環境同埋衛生環境都未如人意,當時上環就有一間被稱為人間煉獄嘅「廣福義祠」,引起社會廣泛關注,亦都催生東華醫院1870年成立,可以話東華三院發源地就係普仁街,而巧合地保良局雖然已經搬到銅鑼灣禮頓道,但最初都係喺普仁街發源。時至今日,普仁街都唔再係墳墓街,而係充滿時尚同藝術嘅街道。

原圖嚟自網絡