被列為法定古蹟嘅更樓同圍牆 覲龍圍

早排阿史就介紹到粉嶺一帶嘅歷史，其中龍躍頭就係粉嶺歷史好悠久嘅一個地方，早喺宋代末年就已經有先民移居嚟呢度。呢個地方先係由彭氏居住，後來就輪到鄧氏定居，建立咗五圍六村，其中一個圍就係覲龍圍。

覲龍圍又叫做新圍，係五圍六村入面保存得相當完整嘅一個，據鄧氏後人所講，覲龍圍早喺十四世紀就已經建村，而早年呢條村並未設立圍牆。咁呢度最出名嘅門樓同埋圍牆最有可能係幾時設立呢？答案就喺門樓上面！

覲龍圍四面由四米高嘅磚牆圍繞，喺門樓石額上面原來寫有「覲龍乾隆甲子歲吉月穀旦立」，即係現時大家睇到嘅門樓同埋圍牆都係喺1744年所建成，真係有相當悠久嘅歷史。而且，成個圍牆同門樓嘅設計都反映住當時嘅局勢，牆身有鎗孔，四角建有更樓，而且兩進仲用上獨立出口，圍門裝埋連環鐵門再加上護城河圍繞，真係充滿防衛嘅意識。