「太古洋行」原本係叫「大吉洋行」？

早幾日就同史友們介紹完有顛地洋行之稱嘅寶順洋行，而今次阿史就想介紹一間1816年成立嘅老牌英資洋行，早喺清朝年間已經同清廷展開過貿易，現時就係一間環球集團。

唔講唔知，太古洋行一早就有英文名Swire，但由於要發展中國嘅業務，就必需要改返個中文名，當中據講真係有段故。洋行嘅創辨人約翰·施懷雅（John Swire）有次就同埋個仔嚟到中國，當時係農曆新年，佢就搭船經過村莊嘅時侯就發現每家每戶門口都貼有「大吉」兩個字嘅揮春，於是靈機一觸就諗到不如就叫做「大吉洋行」，覺得當中會係一個好意頭。但點知佢當時並唔係太識寫中文字，就唔小心將「大吉」寫咗做「太古」，呢次錯有錯着就令到「太古洋行」因而得名。

咁官方又係點樣解釋呢？原來太古洋行就曾經回應過，當時就解釋因為時任英國駐上海領使密迪樂喺1866年上海開業果陣，意識到「太古」呢兩個字會為人帶來視覺上嘅雙關，既會諗到「大吉」又會諗到「太古」，所以就決定改呢個名，又真係估你唔到喎！