香港首個划艇公園—黃泥涌水塘花園

香港水塘嘅歷史相信史友們都知道唔少，唔少水塘都係位於郊野公園之內，成為大家放假果陣嘅好去處。有別於其他水塘，香港曾經係有個由水塘發展成嘅划艇公園—黃泥涌水塘花園。

位於香港島黃泥涌峽，前身係黃泥涌水塘嘅黃泥涌水塘花園，其實早喺1899年建成，認真計數會發現原來呢個水塘係繼薄扶林水塘同埋大潭水塘之後，第三座喺港島興建嘅水塘。而當初之所以要起呢個水塘，係因為經過1894年鼠疫爆發之後，為咗改善港島衛生問題，特別係食水方面嘅衛生，當時港府就決定展開水務設施工程。

黃泥涌水塘喺1899年興建，儲水量為2700萬加侖，水壩18.3米，長82.3 米，同時設有水掣房、導流壩，初時係作為輔助水源為港島提供食水。隨住戰後大型水塘嘅落成，喺60年代黃泥涌水塘嘅供水重要性就下降，當時市政局就決定將呢個地方改建成康樂設施。於是，水塘就喺1986年關閉，並且提供水上單車及小艇租用服務，當時真係好受歡迎，唔少情侶、一家大細甚至明星都會嚟到呢度玩。