前兩日係解放軍嘅八一建軍節，即係解放軍成立之日，其實呢一日對中國共產黨而言係好重要，因為呢個日子係同一場起事有關，就係南昌起義。
南昌起義係發生响1927年8月1日至8月3日，個歷史背景就係响上世紀二十年代第一次國共合作，國民黨出現寧漢分裂，蔣介石方面對中國共產黨實行清黨，1927年7月，中共中央就決定响江西嘅南昌市發動武裝起事，負責組織起事嘅就係周恩來。不過呢次起事就得唔到共產國際支持，於是就張國燾作為中共中央代表去江西阻止起事。之但係，當地共產黨已經準備就緒，結果就响1927年8月1日，周恩來同南昌市公安局長朱德等人指揮部隊向駐守南昌嘅國民黨軍隊進攻，激戰四個鐘後佔領咗南昌全城，公佈咗《八一起義宣言》，對中國共產黨而言，呢次可以話係創立咗人民軍隊嘅一個開始，亦打響咗武裝反抗國民黨嘅第一槍，意思重大。
原圖嚟自網絡
評論：
共0 條評論