如果有史友行過大埔舊墟汀角路一帶,應該都會經過一道好顯眼嘅紅牆,阿史就行過好幾次,都相當好奇紅牆之後到底係乜嘢建築物,一查之下就發現,原來係一間歷史相當悠久嘅道堂。

呢間道堂叫做省躬草堂,如果係講佢創堂嘅歷史,就足足有一百二十幾年,最初呢個道堂係喺廣州建立,早喺清末甲午年間,廣州就流行過一場鼠疫,當時染病嘅人就非常多。當時據講道教教徒就得到道教神仙廣成子指示救災,番禺縣令為咗答謝道教一行人解救疫情,就決定喺縣署旁邊撥地興建省躬草堂,並且批准以扶乩嘅方式求符求藥,而草堂亦都規定「本堂向不受外間分文」。

咁省躬草堂又係點樣嚟到香港呢?原來喺1926年,就有信徒因為得到道教神仙廣成子乩示,表示廣州會有一場大變,就要求教徒搵一個桃源之地興建草堂,當時呢班信徒就嚟到香港建堂,香港嘅省躬草堂就喺1936年建立,堂內就供奉住廣成子,並且為區內嘅市民贈醫施藥。

原圖嚟自網絡