端午節食糉呢個習俗相信大家年年都會做,爬龍舟亦都睇唔少,而喺大澳其實仲有一項被列為第三批國家級非遺代表性項目名錄嘅傳統——端午龍舟遊涌,今次就同大家介紹下呢項習俗啦!

要知道端午節最初嘅時候就係夏季一個驅除瘟疫,送離瘟神嘅日子,只係後來先演化到係紀念楚國詩人屈原。傳統嘅習俗嚟講就有食糉、爬龍舟、掛菖蒲艾草等等,呢啲習俗承傳咗好多年。咁端午龍舟遊涌又有啲咩唔同呢?

原來喺大嶼山大澳喺19世紀就發生過一場瘟疫遲遲都未消退,當時居民就諗到,不如將大澳各間廟宇嘅神明都請晒上龍舟上面,沿住水道巡行,結果瘟疫就真係退咗,自此以後呢項獨有嘅遊涌就成為百幾年間嘅大澳傳統。

現時呢項活動就由三個傳統漁業行會主辦,佢哋先會喺端午節正日前一日去齊大澳嘅四間古廟楊侯古廟、新村天后廟、關帝廟、洪聖廟請神,喺正日就會將神像放到龍舟上面,等居民可以沿住水道焚香拜祭,呢項傳統今年都有繼續舉行。

原圖嚟自網絡