早排阿史就同大家介紹到香港早期嘅一個華人公眾墳場雞籠灣墳場，但最早嘅墳場歷史其實可以追溯到1845年。喺開埠早年，當時政府就已經喺港島建立咗一個墳場，有「紅毛墳場」之稱嘅香港墳場。
香港墳場係香港歷史最悠久嘅墳場，雖然係1845年正式開放，但其實早喺1841年就已經有人安葬喺呢道。大家可能都會有一個疑問，就係點解會喺黃泥涌建設永久性墳場？原來喺香港開埠初期，唔少英國人都唔適應香港氣候而感染疫症死亡，最初只係落葬喺在灣仔星街同埋聖弗蘭士街一帶，但後來由於人數太多就需要另覓土地興建墳場。當時港島就主要有兩大塊平地，中環同埋其中一塊就被認為唔適合發展嘅沼澤地帶黃泥涌，由於工程費用高昂，墳場嘅建設係後來逐步進行嘅。
呢個墳場1845年啟用之後係由港府出錢營運以及英國聖公會管理，最初並無定名，所以公眾就私底下幫佢改名例如盎格魯墳場、公共墳場，亦都因為下葬嘅死者大部分都係外國人，所以又叫做「紅毛墳場」。直到1889年，呢個地方就曾經改名叫做殖民地墳場，去到1970年代又改返做「香港墳場」。
香港墳場現時就有超過一萬二千個墓碑，絕大部分都係外國人，但入面就有安葬咗165名華人、450名日本人同埋100名俄羅斯人，到底要符合乜嘢條件，當中又有咩人呢？下次再同大家介紹。
原圖嚟自網絡
評論：
共0 條評論