繼續同史友們介紹香港開埠初期嘅學校，繼介紹完前身係中央書院嘅皇仁書院同埋英皇書院之後，今次都係時候講一講拔萃男書院。

呢間現址喺九龍嘅學校，原本就係喺1869年嘅西營盤創立，但早期並唔係單純嘅一間學校，而係「曰字樓孤子院」。顧名思義，呢類孤子院其實就即係由教會、紳商同埋慈善團體所創立嘅孤兒教養院，喺戰前就收留咗唔少因為戰爭都流離失所嘅小朋友，既會為佢哋提供溫飽，又會教佢哋知識，甚至喺呢啲小朋友長大之後仲會聘請佢哋做教員。

「曰字樓孤子院」就係由教會聖公會創辦，所以英文名都係用到Diocesan。而喺早期嘅香港係以英文紀錄文件為主，咁喺創校初期拔萃男書院其實又未有一個固定嘅校名，咁當時又係點叫法呢？1878年由政府刊登嘅《轅門報》就叫呢間學校做「曰字樓孤子院」、後來又有叫做「曰字樓男女館」，再之後又有用校長嘅名稱，例如做咗四十年校長嘅俾士校長，就令到呢間學校被坊間叫做「俾士書院」。

咁到底幾時先叫做拔萃呢？其實都冇一個明確嘅答案，據講就係因為20世紀初，拔萃男書院就將個英文名改咗做Diocesan Boys' School & Orphanage，中文就亦都相對改埋做拔萃男書院。而當校舍正式搬到九龍之後，就正正式式換埋現名。

原圖嚟自網絡