尋日阿史就同大家介紹咗一啲日本同埋美國貿易戰之間嘅背景,真正令到日本泡沫經濟爆破嘅除咗係一份廣場協議之外,仲係大量嘅日本民眾都沉迷股票同埋房地產嘅投資,咁到底當時日本社會投機去咩程度?

喺1980年代嘅日本,就曾經流傳過一句咁樣嘅句子,就係「土地不會貶值,房子不會貶值」,呢句說話所代表嘅就係當時日本經濟學上嘅「土地神話」,曾經係全球第二大經濟體嘅日本,當時就有一個估算指全盛時期嘅東京23個區土地價值總和係足以買當時美國全國土地,亦都係因為呢種思想嘅傳播,令到唔少日本民眾都向銀行借錢,投資房地產。帳面嘅財產不斷增加,民眾嘅消費意欲亦都因為咁而增長,形成一個惡性循環。

當時日本企業由此廣場協議令到日元升值,日本企業競爭力下降,但因為有房地產嘅投機,令到股票市場受惠,並且認為只要對土地仍然有需求,股市亦都唔會跌,當時甚至有人形容呢個時期係繼神武景氣、岩戶景氣、奧林匹克景氣、伊弉諾景氣之後嘅第五個景氣時代。

但點知其實日本實體經濟已經踏入蕭條,去到1990年代左右泡沫經濟亦都爆破,樓價同股市都大幅下跌,唔少人嘅財富都畀樓同埋股票套實,想賣都賣唔出,呢個時期亦都有唔少家庭悲劇發生。「土地不會貶值,房子不會貶值」背後就係有一段咁樣嘅歷史。

原圖嚟自網絡