如果史友們參加過一啲墳場導賞團，喺香港墳場可能都會聽過叔何顯理嘅故事，今次阿史就同大家介紹一下第一位由西方移居嚟到香港落地生根嘅婦女——叔何顯理。

叔何顯理出生喺1817年10月28日嘅美國一個牧師家庭，可能因為自幼受到宗教影響，喺佢17歲果年讀到《耶德遜夫人傳》，即時就覺得應該將神嘅旨意同埋救恩帶到東方。於是佢就同一位名為叔未士牧師結婚，喺1836就率先去到澳門建立學校同埋發展當地教會，同丈夫叔未士牧師肩負東方傳教責任。

過咗一段時期，去到1842年嘅3月，佢哋就決定移居到香港傳教，而當時香港嘅天氣對佢嚟講真係唔適應，喺後來出版嘅一本叔何顯理嘅家書集成入面就有提到，當時香港熱得好誇張，每日都要沖幾次涼嚟降溫。

作為第一位移居香港嘅婦女，生活又點止咁簡單。佢一嚟到香港就得到當時港督砵甸乍爵士免費撥出皇后大道臨海地段興建教堂同埋豁免稅務，好快就建成基督喺香港嘅第一位私有產業「皇后道浸信會」。叔何顯理對於女仔嘅教育一直都好關心，一直都有唔少華人女仔搵佢學英文，後來佢仲創立埋第一所女校，既有傳教又有喺香港辦學。

只係去到1844年11月27日，叔何顯理不幸因病去世，當時佢只係得27歲。雖然年紀輕輕，但佢當時對教育同傳教都作出過好大貢獻，令到最後有好多人都出席佢嘅葬禮，北角嘅顯理中學亦都係以紀念叔何顯理而命名。

原圖嚟自網絡