喺港島愛群道一帶,昔日大部分土地仲係海旁地帶嘅灣仔,曾經就有一個山丘,同時亦都係一個石礦場,叫做摩理臣山。

現時摩理臣山就已經唔存在,只係得返一角仔石牆做留念。呢個前身係石礦場嘅摩理臣山取名自一位19世紀來到中國宣教並且從商嘅牧師馬禮遜,佢個英文名就叫做Morrison。咁點解好地地一個石礦場又會同牧師扯上關係,甚至後來仲做埋學校?

原來早喺簽訂《南京條約》果陣,英國方面嘅傳教士就覺得香港係一個重要嘅地方等西方宗傳入中國,於是1842年當時仲未係港督嘅砵甸乍就向倫敦教會批出一塊土地等佢地可以興建教堂同埋學校,就係咁樣,第一間英國人興建同埋香港最早嘅西式學校就出現喇,而當時嘅位置就揀咗喺灣仔一座石礦場山頂,學校就叫做馬禮遜學堂,呢座山就被稱為摩理臣山。

學校營運咗六年左右就喺1849年關閉,呢座山喺幾十年之後亦都因為社區發展需要被夷平,現時就只係喺愛群閣附近有一塊石牆留低。

原圖來自網絡