「三從四德」分別係咩?

喺古代嘅社會入面，對於唔同嘅社會階層都會有唔同嘅規條，喺今時今日睇嚟呢啲規條可能會比較不合時宜，但喺就被視為係美德。今次阿史就想同大家介紹一下古時對女子行為上嘅要求──三從四德。

喺唔少古裝劇入面，都會聽到女主角出嫁前都會被提醒要遵守「三從四德」，但當中又係講緊邊「三從」同埋「四德」呢？所謂嘅「三從」就係「未嫁從父、出嫁從夫、夫死從子」，提出呢個觀念最早嘅來源就係周、漢儒家經典《儀禮·喪服·子夏傳》，當時所提到就係早期女子嘅服喪標準，根據自己當時嘅身份而有唔同嘅服喪等級，慢慢就演變成對女子德行上嘅要求。

至於「四德」，就喺《周禮·天官冢宰第一》入面提過，當時就指「四德」係「婦德、婦言、婦容、婦功」，後來就喺漢代班昭《女誡》入面有更加詳細嘅解說，最初就只係宮廷婦女教育門類，對應地「四德」就係要要求宮廷女子要有品德；建立知識修養、言辭得當；端莊穩重持禮同埋學識治家之道，是為「四德」。