呢幾日最為轟動嘅一單新聞莫過於就係美國政府宣佈45日內要喺美國完全封禁抖音，並且希望微軟同埋另一間美國公司可以接管抖音喺美國嘅業務，事後某啲抖音母公司嘅投資者就可能會得到一啲股權。呢件事就引嚟多方熱烈討論同批評，抖音嘅母公司字節跳動仲表示會通過法律程序反制，到底會發展成點就真拭目以待。但呢件事嘅情節，就令阿史諗起之前法國嘅一間企業阿爾斯通係點樣被美國企業收購。

呢件事就近年就被稱為「法國版華為事件」，阿爾斯通本身係一間從電力及軌道交通基礎設施嘅公司，早喺1928年成立，既有維修法國境內58座核反堆汽輪發電機、戴高樂號航空母艦嘅推進汽輪機，就連法國高速列車同歐洲之星都同呢間公司有關，甚至仲有人形容，世上每四個燈泡就有一個嘅電力就同阿爾斯通技術有關。

本來一切都冇乜大問題，但就喺2003年法國巨企阿爾斯通嘅一位高層皮耶魯齊就喺美國甘迺迪國際機場被捕，當時美國司法部就指控佢涉及阿爾斯通喺印尼一個項目中商業賄賂案，違反美國「反海外腐敗法」，最後皮耶魯齊被判監十幾個月。

呢位高層事後就出咗一本書叫做《美國陷阱》，當中就提到自己喺被拘禁嘅時候，就簽署文件承認指控，公司被罰款7億7千多萬美元。而且，更加重要嘅係，呢間公司仲被多年嚟嘅競爭對手，能源業務美國通用電氣公司收購，變相將阿爾斯通「肢解」，成件事就被形容為美國陷阱。

原圖嚟自網絡