呢排新聞都講唔少關於中美貿易戰，美國要求抖音撤出美國市場嘅消息，咁就令阿史諗起讀書果陣學到嘅一條關稅法——斯姆特-霍利關稅法，亦都係因為呢條關稅法嘅出現，引發一場號稱係史上最大嘅貿易戰，事後仲令到美國經濟進入大蕭條嘅情況。

所謂嘅斯姆特-霍利關稅法，係由美國總統胡佛所簽署，當時美國國內就有成千個經濟學家簽署請願書反對，但仍然無阻呢部法案通過。咁到底呢部法案因何而起呢？事緣係喺1910去到1920年代，美國經濟一直都有一個問題，就係生產能力過剩，特別係農業方面，雖然農業機械令到國內生產效率提高，但對收益方面就冇相應嘅增長。於是，喺1922年就有參議員里德·斯姆特主持起草關稅法案，希望可以提高國內企業市場份額同埋提高關稅，而1928年胡佛競選總統亦都曾經答應上任後會提高農場品進口關稅幫助受困農民。

結果去到1930年6月17日，胡佛就真係簽署呢部由共和黨參議員里德·斯姆特同埋共和黨人眾議員威爾斯·C·霍利共同發起嘅法案，令到2000幾樣進口商品提升到歷史上最高水平。面對咁樣情況，唔少國家都展開反制，報復性咁提高美國嘅關稅，令到當時美國進出口額都跌咗近50％，去到1932年仲係美歐貿易嘅最低位，唔少學者都認為呢部法案帶來美國大蕭條，咁到底當時情況有幾慘？下篇再同大家介紹下！

原圖嚟自網絡