今年係二戰日本戰敗投降嘅75周年，雖然今年日本首相安倍晉三就冇去到靖國神社，但佢仍然奉上祭祀費，並且亦都有內閣成員入內參拜，靖國神社又再次成為一個爭議嘅焦點，今次阿史就同大家講一講當中嘅因由啦！

要知道靖國神社喺日本人心目中係有住獨特嘅地位，呢座奉明治天皇諭而喺東方都千代田區建成嘅神社，原本係用嚟供奉一啲自明治維新以嚟為日本戰死嘅軍人，當中既有日本軍人、亦都有台灣籍同埋朝鮮籍嘅軍人，就連日本天皇入到去參拜都會鞠躬。就咁聽落參拜神社好似冇乜問題，但點解嚟到現代就咁多爭議呢？原來去到第二次世界大戰之前，呢個係國家神道象徵嘅神社就由日本軍方接管，由於呢個地方被視為係軍國主義嘅象徵，日本戰敗之後甚至差啲畀盟軍占領當局廢除，神社要改組為宗教法人先得以保留。

喺1966年嘅時候，日本厚生省第一次將含有遠東國際軍事法庭判決甲級戰犯嘅祭祀名錄提交畀靖國神社宮司筑波藤磨，但當時呢位筑波藤磨就冇加入到供奉名單上。但去到1978年，靖國神社宮司松平永芳就將呢14位戰犯加入到靖國神社合祭，佢呢個舉動令到日本昭和天皇極度不滿，甚至自此以後都再冇參拜過神社。對曾經被日軍侵略過嘅日軍嚟過，將二戰戰犯放入神社供奉呢個舉動，就等同肯定過往嘅侵略戰爭，所以咁多年嚟呢個都仲係一個複雜嘅外交問題。

原圖嚟自網絡