前排阿史就同大家介紹過有「中華牙醫鼻祖」之稱嘅關元昌先生，唔講真係未必知，關元昌先生除咗被孫中山稱為義父之外，佢嘅老婆黎亞妹同樣大有來頭，佢就係香港第一人華人女護士黎亞妹，同時亦都係孫中山嘅老師。

黎亞妹，喺唔少文件記載上又叫做關黎氏(Kwan Lai Shi)，原本佢係出生喺南海西樵扶黎鄉嘅一個望族，但就因太平天國戰亂而被父母帶同去到廣州避難。喺走難嘅過程中，母親就不幸病死，而細佬亦都喺廣州失散，佢父親就決定將黎亞妹留喺十三行街，自己就四出搵返細佬。喺一次機緣巧合之下，黎亞妹就因為喺一個英國官員大宅門口流連，而令到呢位官員嘅老婆心生憐憫，後來仲向黎亞妹爸爸提出收養。

黎亞妹後來就跟住呢位波夫人(Danial Richard Caldwell)同埋養母高三桂夫人(Chan Ayow)一齊嚟到香港，一邊就讀英華女校，一邊就向養父母學習英文。本身喺畢業之後，黎亞妹就已經受聘成為英華女校漢文教員，係第一位香港女教師，與此同時佢仲受聘於法院，做埋第一位法院女傳譯，認真犀利。

黎亞妹後來就同同樣信奉倫敦傳道會嘅關元昌結婚，由於佢哋經常都同會內嘅外國人交流，令到佢敢於接受西法，後來唔少子女後代都做咗西醫，名乎其實係一個西醫世家。而講到黎亞妹其中一樣威水史，當然就係喺雅麗氏那打素何妙齡醫院創院之初，就喺呢間醫院嘅前身做過護士長同埋護理主任，而佢學習相關技術嘅正係陪同關元昌去到廣州教會醫院嘅時侯，喺咁有限嘅人生可以學到同做到咁多事，真係令人慨嘆啊！

原圖嚟自網絡