早排阿史介紹過香港開埠初期一位好重要嘅政商界人物——吉席·保羅·遮打，佢喺19世紀末與20世紀初發起過香港股票交易所，做過立法局同埋行政局非官守議員、創立過置地、九龍倉，甚至牛奶公司都關佢事。唔講真係未必知，遮打嘅晚年就開始從事唔少公益活動，其中一樣就係喺1899年以35,000蚊捐款喺九龍區籌建聖安德烈堂。

聖安德烈堂現時已經係九龍區歷史最悠久嘅基督教教堂，雖然依家已經係一間本地教會，但教堂建成之初主要就係為居港嘅外國人服務，所以就係英語教堂。講起呢間教堂嘅歷史，就要由1897年講起。喺九龍區建立聖安德烈堂，係由聖公會主動提出，喺教堂建成之前，九龍區就有一間木建嘅小教堂畀信眾祟拜。

去到1904年由保羅·遮打爵士捐助35,000港元先至有足夠資金喺羅便臣道興建教堂，而教堂內主要嘅信徒唔少都係駐紮喺九龍威菲路軍營嘅士兵，每逢戰爭爆發，都影響到當時教會嘅營運。喺建築風格上嚟講，呢間教堂屬於哥德式建築，紅磚外牆、尖拱形窗戶、彩色玻璃窗全部都係教堂嘅特色。由於保養得宜，教堂1997年就被列為二級歷史建築，2006年仲奪得聯合國教科文組織亞太區文物古蹟保護獎。

原圖嚟自網絡