國際學校大家可能都聽唔少，咁「英童學校」唔知史友們又聽過未呢？喺尖沙咀彌敦道、聖安德烈堂旁邊，就有一座被列為法定古蹟並且係香港現存最古老嘅英童學校建築，現時就被用作古物古蹟辦事處文物資源中心。

行過路過都未必會睇得出原來呢座建築物有成百年歷史，同唔少當時嘅英式建築都好相似，維多利亞時代建築，因應香港氣侯設有有寬闊遊廊，再加上高樓面、金字瓦頂，經典嘅紅磚外牆。

最初嘅英童學校係喺1894年開幕，第一個名係叫做九龍書院，曾經喺1902年改過名叫中央英童學校、至於九龍英童學校都係佢其中一個名。叫得做英童學校，當然就有佢嘅特色，而呢間學校當年並冇任何華文課程，純料只係畀居港嘅英國人子女入讀。

以往嘅舊校舍都唔係位於現址，現時尖沙咀嘅校舍係由1900年由何東先生以1萬5千蚊港元資助港府興建，而校舍歷時兩年喺1902年建成開幕。學校最初就只有60個小學生，但去到1910年代就轉營中學，全盛時期學生就達到300幾人。去到1930年，呢間學校又再次搬遷，搬到何文田後來仲改名做英皇佐治五世學校，至於尖沙咀校舍直到1991年為至都係尖沙咀街坊福利會嘅會址。

原圖嚟自網絡