喺《詩經．商頌．玄鳥》入面有咁樣嘅一句，「天命玄鳥，降而生商，宅殷土茫茫。古帝命武湯，正域彼四方」，其實唔單止《詩經》，喺《楚辭·離騷》、《史記·殷本紀》入面，對於民族嘅起源都有同「玄鳥」相關嘅記載，咁到底「玄鳥」即係咩鳥呢？

由字面意思理解，相傳商王朝嘅先祖就係由天上派遣嘅玄鳥所生，，而喺《史記·殷本紀》入面就講到「殷契，母曰簡狄，有娀氏之女。……三人行浴，見玄鳥墮其卵，簡狄取吞之，因孕生契」，即係有位叫做簡狄嘅女子喺玄丘誤取玄鳥鳥卵吞食而生咗契，契後來又因為幫助大禹治水有功而被舜帝封為司徒，封於商地，佢亦都係被視為商嘅始祖閼伯。以上兩段嘅記載都充滿神話色彩，係真係假真係印證唔到，但唯一有可能考據到嘅事就係，到底「玄鳥」即係邊種鳥。

據目前嘅考古發掘對商朝嘅理解，「玄鳥」最有可能係鴞、又叫做梟，亦即係貓頭鷹。喺古代嘅中國，唔少飛鳥都被視為係人間同埋上天溝通嘅使者，所以無論係喺仰韶文化遺址（公元前5000－前3000年）、紅山文化（公元前4000－前3000年）定係殷墟出土器物，都搵到唔少鴞型的器物，由鼎、玉器、禮器都有，而且造型、雕法與紋樣都相當精緻，反映住鴞已經係一種有規模嘅信仰。圖入面呢兩張就係殷商婦好墓出土嘅石立梟，唔知史友們又覺得雕得似唔似呢？

原圖嚟自網絡