因為翻譯出錯而命名嘅「大強街」

早排就因為介紹到日軍侵佔香港而引發嘅攻守戰，當時其中一個激烈嘅戰場就係北角嘅發電廠。提起呢間發電廠，就當然要介紹埋附近嘅「大強街」啦！

就咁聽落「大強街」呢個街名好似有啲怪怪地，原來呢條街名嘅怪並唔係冇原因，因為佢最初真係因為翻譯出錯而命名嘅。大強街就係一北角區嘅一條道路，由英皇道同炮台山道交界，去到城市花園道，咁又同翻譯出錯有咩關係呢？

原來大強街英文係叫做Power Street，當中嘅Power其實就係嚟自附近嘅北角發電廠，原本中文名應該係要叫做電力街。但點知當時就有人將Power理解咗做強大力量，於是就變咗做「大強」，真係估佢唔到！