颱風溫黛吹襲香港

早排因為熱帶風暴海高斯嘅到來，史友們都經歷過一次九號風球，有賴現代嘅通訊同防災科技，呢次嘅颱風就冇為香港帶嚟太大嘅破壞，但1962年嘅今日就唔係易過喇，溫黛呢個名相信唔少史友都仲有印象。

1962年9月1日，颱風溫黛吹襲香港，由8月31日開始逐步集結，喺下午嘅時份香港就已經懸掛三號風球，去到9月1日天文台最高就錄得每小時259公里嘅陣風時速，天未光就已經改掛九號風球，後來仲掛到十號風球。由於當日正係天文大潮，再加上強勁嘅風力，令到香港多處遭受嚴重破壞，沙田、馬料水、大埔一帶被風暴摧毀，吐露港亦都出現風暴潮，海面比正常最高潮水位仲多出3米，災情隨住9月1日下午溫黛遠離先得以緩和。

據事後嘅統計，呢次嘅風災令到183人死亡，當中有127人係受吐露港風暴潮淹沒，仲有接近400人受傷，過千艘小艇以及沉沒。至於沙田、馬料水、大埔一帶嘅房屋都大受破壞，市區唔少設施好似廣告招牌、架空電線都散落一地；新界農作物亦都損失嚴重。