三年零個八月嘅歷史阿史都同大家講唔少，喺日軍進攻香港嘅時候，除咗喺北角、赤柱同守軍展開過激戰之外，港島南部嘅淺水灣同樣都係好慘烈。

喺1941年12月22日開始，守軍就已經喺港島幾條重要嘅防線同日軍交戰，包括中西部嘅山地、北岸嘅市區、南部嘅淺水灣及東南部嘅赤柱，而早喺22日嘅早上十點，日軍第229聯隊第10中隊就已經佔領咗淺水灣海灘一帶嘅樓宇，令到當時守軍嘅中部再冇交通，被分割成東西兩個部分。

被圍困嘅英軍當時就駐守喺淺水灣酒店，但食水糧食好快就已經斷絕，酒店入面嘅守軍軍官華里士同埋行政立法兩局非官守議員蕭士就商量過投唔投降，當時華里士就建議所有婦孺離開酒店，至於蕭士就覺得咁樣做婦孺反而更加危險，所以最後就決定由守軍撤出酒店，等酒店入面嘅住客可以自行向日軍投降。

於是，去到22日晚上10點，守軍就撤離咗，日軍亦都喺深夜入到酒店，雖然當時並冇對呢批平民報復，但就去到淺水灣「余仁生」第二代經營者余東旋擁有嘅別墅余園屠殺英軍戰俘。據事後研究呢次屠殺就死咗60幾人，係打完黃泥涌峽戰之後，日軍入到呢個英軍曾經嘅防守據點，將戰俘帶到余園外圍懸崖，部分人就被槍殺跌落崖下，自此淺水灣余園亦都成為著名兇宅，目前就已經被清拆咗喇！

原圖嚟自網絡