早幾日對深圳人嚟講係一個好特別嘅日子，就係深圳經濟特區成立嘅四十周年。呢四十年話長唔長，話短唔短，但要發展到咁嘅程度真係相當唔容易，可能有史友會問，到底經濟特區呢個諗法係點樣嚟呢？今次阿史就同史友們介紹下啦！

喺文化大革命之後，鄧小平就第三次復出，當時佢就打破以往領導人好少出訪嘅慣例，一口氣就訪問咗8個國家，而當佢去到一個國家嘅時候，就令到佢諗到「經濟特區」呢個概念。

阿史想講嘅就係新加坡喇！鄧小平去到新加坡就發現到，呢個土地面積只有587平方公里、人口230萬嘅國家，竟然每年可以有200幾萬嘅外國遊客，旅遊總收入仲可以去到10億美金。而且，早喺60年代新加坡就已經注重發展對外經濟，利用到傳統工業由外國引入資金同埋技術，先可以令到呢個國家經濟有咁快嘅發展。

鄧小平當時就相當讚賞新加坡引入外資嘅經濟政策，雖然以往就中國經濟對外嘅聯繫唔多，而且仲有唔少限制，但呢次嘅外訪就令鄧小平意識到中國國門再唔打開，就根本搞唔成現代化。於是佢一返到中國之後，就多次提出引入外資同埋世界先進技術作為一項發展政策，仲表明「這件事我看廣東可以放手幹」。於是，去到1979年4月，鄧小平就直頭提出將呢個「改革嘅試驗場」叫做「經濟特區」喇！

原圖嚟自網絡