早兩日阿史就同大家講過一場被遺忘嘅血戰——新界六日戰,亦都有介紹過吉慶圍嘅鐵門事件,但到底呢場六日戰係點樣開戰呢?咁就要由大埔開始講起喇!


因為《展拓香港界址專條》嘅關係,英國人就打算喺1899年接管新界,但新界居民前景不明,再加上民族情緒嘅因素,一早就準備武力反抗。當時英國人打算喺1899年4月8日喺大埔舉行升旗儀式,於是就先派工人去到旗桿山建造蓆棚,但點知工人一去到就被當地村民恐嚇。事件傳到去當時嘅香港總督卜力,當時佢哋先意識到新界有反抗嘅勢力。


差唔多時間,警察總隊長梅含理亦都親自去到大埔新墟文武廟,但同村民傾咗幾句之後就因為蓆棚而再起爭執,結果村民就開始擲石同埋雜物,梅含理就直接叫手下拎出步槍同刺刀先順利可以走到上旗桿山。梅含理被困旗桿山,亦係依家嘅綠匯學苑、舊大埔警署,佢就叫手下返港去島求救,但當時已經有大批村民逼近。梅含理只好走到附近樹林,直到第二朝先有援軍到場。


眼見咁嘅情況,升旗儀式改咗去4月17日,梅含理又再次入到文武廟,得知居民仍然想反抗,呢次佢離開嘅時候就係出去帶同一隊由印度士兵組成嘅「香港軍團」開戰,並且自己乘坐戰艦「名譽號」到場。初時英軍面對住過千村民真係難以應戰,但隨住「名譽號」同埋船上嘅火炮到來,原居民就真係不敵散去。英軍亦都乘機舉行升旗禮,大埔村民就咁退出戰事。


原圖嚟自網絡