近排喺古蹟界就有一單幾受關注嘅消息，就係古物諮詢委員會計劃會喺今個星期為一批歷史建築評級，其中一個新嘅評級項目將會係西營盤第二街公共浴室，真係估佢唔到。

可能年紀較輕嘅史友未必會知道點解要起呢類公共浴室，當中嘅原因就要由成百年前講起喇！喺上個世紀初，鼠疫仍然係香港嘅流行疾病，繼西營盤起咗公立醫局之後，為咗進一步改善華人嘅衛生環境，當局就決定喺中西區建立公共浴室。

現時大家見到位於西營盤第二街嘅公共浴室係喺1922年重建嘅，呢座公共浴室以粉紅色為主，講求實用性，內部仍然係用緊近百年前嘅設計，唔少間隔都無注重到私隱。公共浴室至今都仍然運作緊，為有需要嘅人提供服務，而每年就只有十一月至四、五月提供暖水，其餘時間就只可以沖凍水涼喇！

原圖嚟自網絡