日軍廣東受降史料曝光 清晰記載香港守備隊位置

早幾日就係中國抗日戰爭勝利75周年紀念日，當日國家領導人就同各界代表一齊向抗戰烈士敬獻花籃，同日亦都公佈咗第三批入選國家名錄嘅抗戰勝利嘅遺址，而喺紀念日嘅前夕，就有一份好重要嘅史料曝光，印證咗當時受降之後香港日軍嘅遷移安排，同埋更加重要嘅係，當時香港嘅受降主權係被侵占咗。

呢份史料相當形貴，事關係第一次有文件記錄到廣東同埋香港受降前嘅「敵我態勢要圖」，當中仲明確標示到日軍佔領廣東嘅位置同埋軍隊嘅番號，而香港嘅部分甚至仲有埋當時「香港防衛隊」嘅佔領位置，相當詳細。

而呢份史料當中就有一張1945年「第二方面軍受降部隊行動概見圖」提到，日軍投降代表係侵華日軍第23軍司令官兼香港佔領地總督田中久一，而辦理日軍投降地點就係廣州。本來按照部署受降之後嘅香港守備隊係應該按規定移到去寶安，而香港就係由第二方面軍司令官張發奎負責接收，但喺美國支持下，就幫助英國直接接管香港，成個受降主權原來係被侵占。