上幾篇就同史友們講到港英政府1984年就忽然推出《代議政制綠皮書》並且喺1985年舉行咗第一次嘅立法局選舉，雖然呢一次係屬於間接選舉，但都令到唔少香港人嚇一跳。

咁喺呢次間接選舉之後，1987年5月港英政府又發表一份《一九八七年代議政制發展檢討綠皮書》，呢份報告主要就係對香港代議政制嘅發展進行檢討，並且探討引入直接選舉嘅方式。當時呢個消息一流出，唔少市民都表示支持，並且希望可以喺1988年嘅立法會選舉實行直接選舉。當時有超過一百個當時嘅民主派人士就去到維多利亞公園舉行「爭取八八直選集會」，亦有唔少市民到場支持。

睇到咁嘅情況，港英政府就自行成立民意匯集處進行兩次民意調查，同時坊間亦都有唔少同類民意調查進行。結果，由港英政府委托嘅民意調查就得出「有七成市民反對八八直選」結論，呢個結果同其他民意調查差太遠，後來仲被人證實呢個結果係以73,767份是預先印製而內容相同嘅標準信件所刻意歪曲。

於是，去到1988年2月10日，港英政府就發表《代議政制今後的發展白皮書》，表明「雖然市民對在立法局於三年後加入若干直選議席此項原則，表示支持，但是在實行時間上則有歧見」，所以1988年香港立法局都係繼續用間接選舉方式進行。

原圖嚟自網絡