呢排迪士尼電影《花木蘭》上畫,不過就有頭威無尾陣,仲被內地官媒話套戲藝術水平低下,而且又誤解中華文化,未能同中國觀眾產生共鳴咁話喎。不過阿史今次想講嘅,係花木蘭呢個民間故事。由細到大聽花木蘭呢個故事,都以為佢係姓花叫木蘭,但其實呢個只係一個誤會。

相信唔駛多介紹,花木蘭故事係源自《木蘭辭》。《木蘭辭》最初錄於南朝陳朝釋智匠 《古今樂錄》,後經隋唐文人潤飾。故事係講一個叫木蘭嘅姑娘,女扮男裝代父從軍,十二年服役期間戰屢建戰功,最後功成身退返鄉同家人團聚。如果史友們讀過木蘭辭,都會發現呢篇嘢都只提「木蘭」,但無提到佢姓乜。佢之所以被稱為花木蘭,唔少人認為係根據明代文學家徐渭所編嘅雜劇而出現。徐渭所編嘅《四聲猿》當中就有《雌木蘭》,當中响開場木蘭就自報家門:「妾身姓花名木蘭,祖上在西漢時,以六郡良家子,世住河北魏郡。」仲作埋佢爸爸名弧字桑之。就咁,木蘭就變咗姓花,後世人亦慢慢改稱為花木蘭。

原圖嚟自網絡