舞火龍嘅起點 大坑蓮花宮

每年必睇嘅中秋大坑舞火龍早前負責主辦嘅街坊福利會就宣佈，因為疫情嘅關係會取消今次中秋嘅舞火龍，但就希望年尾有機會可以舉行，做到舞火龍抗疫。既然冇得睇舞火龍，咁就不如介紹下同火龍有關嘅地方，今次就講下位於大坑嘅蓮火宮啦！

大坑蓮花宮位處銅鑼灣，現時被列為法定古蹟，關於呢座建築嘅建成年份，其實就冇明確嘅文字紀錄，但按照廟內最古老嘅銅鐘推斷，蓮花宮建於清朝道光二十六年、並且喺同治二年（1863年）重建，保留咗今日嘅建築外型。蓮花宮本來係私人產業，但就因為管理不善而自行交咗畀華人廟宇委員會管理。至於點解會有呢座廟喺度，相傳就係因為當地漁民認為觀音大使曾經喺該地顯靈，並且祝福過佢地，所以就用到觀音大使坐喺蓮花上下凡呢個構念建立廟宇。

如果史友們有行開廟，應該都會發現呢座建築嘅風格相當奇特，甚至可以話係獨一無二。一般嘅兩進式傳統中式建築都係四四方方，但大坑蓮花宮就好唔同，兩進之間既冇天井，而且形狀上前進嘅建築係半八角形寶塔狀嘅重檐攢尖屋頂，門口嘅欄杆仲有些少西洋風格，當年嚟講絕對係好前衛。至於後進就係採用長方形，亦都係蓮花石所有嘅位置，成個建築設計相當有心思。