1994年嘅「新九組」 令選民數目高達106萬？

呢排阿史就同大家講唔少港英政府時期急速改變代議政制嘅事件，有1985年嘅立法局間接選舉，又有「九一直選」，當中仲幾次更改同發表過《代議政制綠皮書》，而講到最具爭議嘅一件事，當然就係1994年嘅「新九組」。

所謂嘅「新九組」其實就係1992年港督彭定康喺第一份嘅施政報告提出嘅政改方案，就係新增九個功能組別，「新九組」就包括漁農、礦產、能源及建造界；紡織及製衣界；製造界；進出口界；批發及零售界；酒店及飲食界；運輸及通訊界；金融保險地產及商業服務界；公共、社會及個人服務界，合共九個。

就咁新增功能組別似乎就冇乜大問題，但係呢個「新九組」方案就有幾個巧妙嘅地方係利用咗《基本法》灰色地帶，當中就有提議喺九個功能組別嘅選票直接由個人票取代團體票、從事呢個九個行業嘅市民就自動成為功能組別選民，變成就令到九個議席成為直選議席、選民人數忽然增加咗106萬，真係前所未有嘅變化！