上星期介紹咗俄羅斯遠東港口城市海嵾威，今個星期就想介紹下同海嵾威相隔過萬公里嘅俄羅斯西邊著名港口城市聖彼得堡。


坐落波羅的海芬蘭灣嘅聖彼得堡，係俄羅斯第二大城市，亦係歐洲其中一個歷史名城。雖然佢响俄羅斯有好重要嘅歷史地位，但呢個城市相當其他歐洲大城市，歷史就唔係好長。呢個城市係响1703年由時任沙皇彼得一世奠基。

講到聖彼得堡，就一定要講講彼得一世呢位沙皇。呢位被認為沙俄皇朝最傑出嘅沙皇，制定國家西化政策，令俄國搖身一變成為歐洲強國。佢响少年時代曾經响歐洲遊歷過，佢仲响荷蘭東印度公司作過船長，又响英國造船廠工作過，仲响普魯士學過射擊。佢返到俄國後，為咗進行西化改革，於是引入好多西方技術人才，建立咗第一支具規模嘅俄國海軍。後嚟，彼得大帝通過戰爭吞併咗愛沙尼亞、拉脫維亞同芬蘭嘅部分領土，為俄國提供咗波羅的海一個出海口，於是就建立咗一個海港城市，呢個就係聖彼得堡。所以話，聖彼得堡絕對係彼得一世實現野心嘅見證，亦成為俄國「瞭望歐洲的視窗」。

响十月革命之後，聖彼得堡响列寧逝世後改名為列寧格勒。响二戰期間，列寧格勒曾經歷納粹德國軍隊長達872天嘅封鎖，呢場列寧格勒保衛戰成為咗現代歷史上時間最長、破壞最嚴重、傷亡人數最多嘅圍城戰之一。蘇聯解體後，當地居民投票決定將市民改返做原名聖彼得堡。現時聖彼得堡係俄羅斯一個著名旅遊城市，彼得保羅要塞、斯莫爾尼大教堂三一大教堂、彼得大帝青銅騎士像、夏宮冬宮等每年都吸引唔少旅客嚟玩。

唉！真係想去睇睇呢個地方。