前排阿史就講起911恐怖襲擊同埋美軍為咗回應呢件事而發動嘅阿富汗戰爭，喺呢兩件事發生嘅之後，就有一個叫維基解密嘅網絡媒體爆料，當中有唔少西方國家嘅醜聞，美國軍隊喺阿富汗戰爭入面嘅76,900份戰爭文件都披露咗出嚟，但當中最誇張嘅都係40萬份伊拉克戰爭紀錄同埋截圖入面嘅呢條片。

呢條片當年好出名，事關2010年4月果陣，維基解密就專門開咗個位畀呢條片，名為「附帶謀殺」（Collateral Murder）。片後全長39分鐘，就係喺2007年7月12日果陣，美國軍隊喺巴格達用2架阿帕契直升機進入居民區，聲稱「與叛亂分子駁火」，但射殺幾個無辜嘅平民，當中有幾個係伊拉克記者。事後維基解密喺2010年4月5日仲公布咗直升機第一視角嘅槍擊鏡頭，亦都經過美國國防部官員認證屬實。片段中嘅軍人唔單止開槍射殺平民，而且仲話期待有人對佢哋還擊，更加恥笑果啲救助傷者嘅路人。

成條片段入面，美國展開咗三段攻擊，先係槍殺七個平民，跟住就搶殺救人嘅司機，最後就係駁火轟炸民宅。種種行為都令到美軍受到各方指責同批評。但呢件事發生之後，並唔係相關嘅軍人受到懲罰，反而係泄密嘅美國陸軍第10山地師情報分析員曼寧被控22條有關間諜罪、盜竊罪、電腦詐騙、違反軍紀罪名，被判35年，最後經美國總統歐巴馬特赦，共入獄約7年。

原圖嚟自網絡