典型中國傳統書室——植桂書室

呢排都同史友們介紹開新界六日戰嘅故事，新界一帶唔單止得同六日戰有關嘅遺址古蹟，其實仲有唔少傳統中式建築，今次阿史想介紹嘅植桂書室都相當有睇頭架！

植桂書室歷史相當悠久，早喺英國租借新界前嘅1899年就已經存在，名乎其實就係一座清朝嘅歷史建築。佢嘅建成年份到目前為止都仲未有定案，但學者就估計係清朝中葉，八鄉上村嘅黎氏族人黎金泰為咗教育鄉村子弟而建，去到上世紀30年代，呢所傳統嘅中國書室同時都有用作祭祀祖先、畀村民舉行會議、春秋二祭同埋婚嫁儀式，真係幾多功能下！

隨住上世紀港府推廣現代小學教育，植桂書室喺戰後亦都先後轉型做「永慶學校」同埋幼稚園，但後來村內嘅學童減少，呢道去到60年代亦都停辦空置。去到2007年，植桂書室就先被列為三級歷史建築，經過古物古蹟辦事處修復同年更被升級為法定古蹟，開放畀市民參觀。