早幾日阿史就為大家介紹到晚清名臣李鴻章眼見西方船堅炮利，決定要改革當時嘅中國，於是就促成咗上海輪船招商局，並且發行近代第一張股票「招商集股」，希望通過呢筆資金可以令到清朝現代化。李鴻章呢個願望未能實現，仲係冇幾耐之後清朝就因為輸咗甲午戰爭而要簽訂《馬關條約》。

唔講真係唔知，原來《馬關條約》嘅出現都催生咗另一隻股票出現，呢隻就係昭信股票。同招商集股有啲唔同，昭信股票係由清廷主導發行，並且可以進行抵押、售賣，本質上同現代嘅股票更加相似。至於點解清廷會發行股票呢？原來喺《馬關條約》第四期賠款即將到期之前，朝廷就計過下數發現唔夠錢還，於是就諗到向民間集資。1898年2月4日，清政府准奏戶部印造昭信股票100萬張，發行總額為1億兩，面額分100兩、500兩、1000兩一共3種，年息就有5厘，分20年還清。

昭信股票當時係被視為自強股票，係想民眾「因國計自強派股」，進而「人人曉以休戚相關之理，人人動其忠君愛國之忱」。「昭信股票」意思即係「就認股數目以昭信守」顯示政府信用，發行時都有唔少民眾購買，但係冇幾耐發行過程中，唔少地方官府苛派抑勒、強令捐輸，加上還本付息嘅過程做唔足，令到怨聲載道，結果喺同年9月就停辦咗喇！

原圖嚟自網絡