提起孫中山先生喺香港嘅革命史,唔多唔少都會諗到位於中上環一帶嘅一啲遺址,現時就被當局整合成孫中山史蹟徑。但唔講唔知,其實遠在屯門區,都一樣有孫中山同埋當時革命黨嘅足跡架!

阿史想介紹嘅青山紅樓係位於屯門中山公園入面,相傳呢個地方當時係孫中山同埋當年革命同志其中一個聚會地,所以公園內仲設有孫中山嘅銅像以及紀念碑,園內曾經仲有6株桄榔樹,據講仲係由黃興同埋孫中山所種植。

呢個公園又係點嚟呢?呢個公園所在地其實係屬於香港商人李陞個仔李紀堂,早年仲係「青山農場」。李紀堂喺一場機緣巧合之下,就喺日本嘅船上識到孫中山、1895年加入埋興中會,自此青山農場就成為興中會嘅基地,用嚟做軍事訓練、儲存武器,山坡當年仲有靶場,據講惠州起義、廣州黃花崗起義都係喺度策劃。

至於紅樓就係「青山農場」嘅1920年代建成嘅一座混合中西建築風格嘅紅磚房屋,入面就有一塊命理論牌匾、木桌,亦都據講係由孫中山所用。紅樓早年被列為一級歷史建築,但就因為地皮轉手曾經受到建築工人破壞,至今為止點樣處理都仲未有定案。

心水清嘅史友們可能都留意到阿史用咗唔少「據講」、「相傳」呢啲字眼,事關紅樓同埋青山農場呢段歷史,有確實文字記載嘅並唔多,主要係口耳相傳為主,所以令到紅樓仲未能夠成為古蹟。

原圖嚟自網絡