話說早排荷蘭博物館嘅團隊就做咗一件令大家估都估唔到嘅事，就係憑住微細嘅觀察，幫到兩幅分散咗125年嘅肖像畫重聚。

呢兩幅肖像畫嘅主人其實係文藝復興時期嘅科隆上流社會夫婦，佢哋叫做Jakob同埋Elisabeth Omphalius。由於當時仲係處於一個未有相機嘅時代，所以如果想做啲嘢留念，就主要係通過肖像畫。佢哋當時就搵嚟科隆嘅一位著名畫家Bartholomus Bruyn，喺1539年為佢哋繪畫咗呢兩幅畫像，等佢哋可以長年對望。

呢兩幅畫像足足喺佢哋後人嘅屋企掛住350年，本來都相安無事，但唔知點解呢兩幅畫像就喺1896年被放到去拍賣，仲要係分開嚟賣。結果Jakob果幅畫就畀人賣到去英國，而Elisabeth果幅幾經轉手去到荷蘭國立博物館。

後來，有藝術史學家就發現，呢幅畫唔應該只係得一幅，而係一對。於是博物館嘅團隊又花費幾十年時間喺歐洲各地嘗試去搵返Jakob果幅畫，最後就喺男方嘅衫領同埋女方嘅腰帶位置嘅花紋得出結論，仲用咗25萬歐元買返嚟，等兩幅畫可以團圓，認真甜蜜。

原圖嚟自網絡