近排內地網民就瘋傳一張相,相入面就係國務院總理李克強去到上海浦東新區視察,視察完之後就去到上海南京東路步行街買咗20蚊地歷史悠久嘅大白兔牛奶糖,唔少網民都大讚佢係國貨代言。咁今次阿史就順便同大家介紹下呢隻大白兔牛奶糖啦!

相信大部分史友童年時候都會食過呢隻糖,但唔知史友們又知唔知呢隻糖原來唔係叫做大白兔牛奶糖呢?呢隻糖嘅前身係叫做「ABC米老鼠」奶糖,由當時上海ABC糖果廠老闆馮伯鏞試完英國嘅牛奶糖之後,決定為中國仿制。呢粒糖今時今日當然係經過唔少改良,但1943年喺上海手工生產果陣,最初嘅成分就只係得液體葡萄糖、白砂糖、奶粉、煉乳等。至於點解叫做「ABC米老鼠」,就係同當時上海流行嘅米老鼠卡通片得到靈感,所以蠟紙包裝上面都有紅色米老鼠圖案。

而去到1956年ABC糖果廠國有化之後,成間廠就叫做愛民糖果廠、「ABC米老鼠」亦都改名叫做「大白兔奶糖」,轉輾之下呢間公司就被併入上海冠生園「大白兔奶糖」70年代真係好威水,直頭被當做國禮送畀其他國家領導人,尼克遜訪華、赫魯曉夫等人都收過呢款禮物。

喺中國經濟同糧食最困難嘅時期,呢粒糖真係幫咗唔少國人補充營養,所以又有「七粒大白兔奶糖能泡一杯牛奶」嘅講法,近年亦都有唔少電影回憶起呢粒糖,《三峽好人》、《山楂樹之戀》唔知史友們又有冇睇過呢?

原圖嚟自網絡