如果史友們有參加過啲導賞團,行過入香港墳場,應該都會聽過一件事,就係香港墳場內除咗係有唔少英籍軍人、政府官員或者歐洲人嘅墓碑之外,原來仲有為數唔少嘅日本人墓碑。到底係咩原因令到呢個由開埠去到20世紀中期嘅墳場內,有咁多日本人墓碑呢?
其實早喺香港開埠以嚟,香港同日本就有唔少交流,其中喺明治初年日本仲撤銷國民渡航海外禁令,咁就有唔少日本人嚟到香港發展,呢個風氣去到1902年年《英日同盟》結成之後就更加犀利。咁當時日本人嚟到香港又係從事咩行業呢?
據學者高添強嘅研究就指出,日本駐港領事館就做過唔少調查,發現香港曾經喺於 1857 至 1894 年及 1900 至 1932 年實行公娼制,呢段時期就有唔少出生喺低下階層嘅日本婦女被誘騙嚟到香港嘅風月場所、亦都有日本人經營表面好似「咖啡館」但實質係妓院嘅場所,數量多達十幾間,婦女嘅人數就達到七十幾個,主要係喺中環士丹利街、威靈頓街、荷李活道一帶。雖然係咁,但同時都有唔少日本人經營服裝店、美容院、首飾店,唔係完全同風月場所有關。喺呢啲最初嚟到香港嘅日本人過身之後,因為各種原因未能送返日本安葬,於是香港墳場就成為佢哋長眠嘅地方,亦係解釋到點解墳場內有咁多日本人嘅墓碑。
原圖嚟自網絡