早兩日就同史友們講到，由於中秋國慶雙節同慶嘅關係，黃鶴樓亦都係35年以嚟第一次開放夜遊。有心水清嘅史友就即時問到，又話黃鶴樓有好耐歷史嘅，點解會係35年嘅？咁到底原本黃鶴樓又係咩樣呢？

先講黃鶴樓嘅位置，現時嘅位置就係武漢市武昌蛇山上，但其實係1957年之前係喺今日長江大橋武昌引橋嘅位置，但當年就因為建橋而需要用到黃鶴樓嘅遺址，直到1981年10月武漢市政府先至參考歷史資料重建黃鶴樓，到1985年先至落成。咁原本嘅黃鶴樓又係點樣呢？

據古書記載，黃鶴樓最早就喺三國時代東吳黃武二年（223年）出現，而《元和郡縣圖志》入面就講到當年孫權始築夏口故城，係因為軍事目的；亦都有另一個講法係指呢座樓係一個叫辛氏嘅人開設嘅酒店，但點都好，後來就因「城西臨大江，江南角因磯為樓」，所以就叫咗做黃鶴樓。

黃鶴樓呢個名雖然有幾耐歷史，但歷代都係受到多次戰火摧殘，單單係明清兩代就被毀7次，仲未計重修嘅次數，所以又有「國運昌則樓運盛」嘅講法。近代睇到嘅呢一座黃鶴樓就係同治七年（1868年）建成、毀於光緒十年（1884年），圖入面嘅兩張黑白相，都係1870年代影落嘅黃鶴樓，唔知史友們又覺得靚唔靚呢？

原圖嚟自網絡