沙田馬場啟用

每逢星期三晚、星期六/日又或者公眾假期，對唔少史友嚟講可能都係一個重要嘅日子，事關當日好有可能有馬跑！而喺1978年嘅今日，對馬迷嚟講又係一大改變，事關香港終於有第二個馬場喇！

阿史講緊嘅當然就係沙田馬場啦！呢個位於火炭東部嘅場地就係喺1978年10月7日啟用，馬場內部有齊草地、泥地跑道，周長有成1900米，可以同時容納到85,000人入場睇馬，成個設施仲被評為亞洲頂級賽馬場地，每年都有唔少國際大賽喺呢度舉行。

其實史友們都應該會知道，香港本身就已經有一個歷史好悠久嘅跑馬地馬場，點解又會同時間要再起一個呢？原來隨住跑馬呢項運動慢慢平民化，跑馬地馬場就慢慢成日都舉起滿座嘅紅旗，唔少市民都冇辦法入場睇馬，仲可能因為人流過多而有意外發生。於是，馬會就喺1964年開始計畫興建一個新嘅馬場，去到1971年10月政府正式批准，1973年12月就展開工程。如果有史友們有睇過早年嘅火炭地圖，應該都會發現一點，就係馬場嘅位置好近以前嘅沙田海。