早兩日就係太空館建成嘅四十周年，阿史喺介紹太空館建成嘅時候就有提到一個人嘅人名，呢個就係設計成個「菠蘿包」嘅外形、亦都係首任太空館館長嘅廖慶齊先生。

廖慶齊嘅資歷當然唔止咁簡單，佢絕對可以稱得上係香港天文之父。廖慶齊出生喺1931年嘅上水，係一位原居民，年幼就對一片星空感到興趣，喺媽媽支持下就自學天文、開始拍攝夜空同沖洗相片。喺1961年佢就考取到港大文學士學位，60到80年代都喺皇仁書院教授中國文學同埋歷史，期間佢亦都有繼續發展佢嘅愛好天文學，甚至仲喺皇仁書院成立天文學會。

唔單止係創立學會，去到1972年佢甚至仲喺自己上水嘅屋企成立香港第一間私人嘅天文台，自己加設咗當時相當先進嘅卡塞格林式反射望遠鏡同埋越軸式（十字軸）赤道儀，影咗唔少月球同埋行星高解像度嘅底片。佢所拍攝嘅一幅月球環形山特寫，甚至後來仲被美國《天空與望遠鏡雜誌》雜誌刊登，去到1974年佢仲登上埋呢本雜誌嘅封面，真係唔簡單！

咁之後嘅故事大家應該都有聽過，佢喺1980年10月就開始出任太空館館長，5年之後就因為健康問題退休移居美國，但仍然都有進行天文攝影、繼續定期返香港幫手推廣太空館嘅活動。

廖先生屢獲獎項，就好似「美國天文聯盟」舉辦天文攝影比賽冠軍、日本頒發「奇諾天文獎」等，而講到最威水嘅一件事，就係1998年4月國際天文學聯合會批准將6743號小行星命名為「LIU」，認真係星夢留痕。

喺廖先生去世前一個星期，其實佢仲喺居所後院睇緊月全食，佢喺2014年4月23日與世長辭。

原圖嚟自網絡