喺疫情之下,行山已經成為唔少香港人星期六、日例牌嘅活動,西貢東部嘅地質公園更加成為熱門嘅「打卡位」。唔講唔知,其實喺呢個地質公園入面,曾經有一座超級火山。

阿史所講嘅之唔係糧船灣嘅火山地帶囉!糧船灣超級火山(High Island Supervolcano)位於糧船灣延伸至果洲群島一帶,就咁計直徑就已經有18公里長,覆蓋住大部分香港世界地質公園西貢東部火山岩區。

糧船灣超級火山地帶本來係一個寂寂無聞嘅地方,但後來經過土木工程拓展署多年嘅研究,就發現原來呢度係香港第一座發現到嘅古代超級火山,仲喺2012年嘅美國地球物理期刊《Geochemistry, Geophysics, Geosystem》發表咗呢個大發現。咁到底有呢個超級火山幾超級呢?假如用噴發量嚟計,呢個火山一旦爆發,九龍半島、港島北部嘅岩漿就會有1萬3千億立方公尺火山灰,可以令到香港鋪上一層1.3公里厚嘅火山灰。

雖然係咁,但史友們都唔使太擔心,事關呢個火山對上一次爆發已經係1億4千萬年前,而爆發完之後嘅岩漿、火山灰經過冷卻就表面形成咗六角柱石、深層嘅就形成花崗岩,為大家帶嚟唔少獨特嘅地貌。

原圖嚟自網絡