「鴛鴦」係碼頭工人發明？

無論係早餐、午餐定係晚餐，只要史友們係喺茶記食飯，九成九都會有杯餐飲，港式奶茶就當然係唔少人嘅至愛，之前仲有個統計話香港人一日會飲到270萬杯奶茶，真係超級誇張！提起港式絲襪奶茶起源，相信唔少史友都會知道係1950年代由蘭芳園店主林木河所創，咁如果問到由港式奶茶衍生出嚟嘅「鴛鴦」，唔知史友們又知唔知係邊個發明呢？

關於「鴛鴦」呢種飲品嘅起源，其實都未有一個好肯定嘅講法，但主流都係話同碼頭工人有關。據講喺絲襪奶茶出現之後，唔少平民都鍾意咗呢種飲品，碼頭工人都一樣。對碼頭嘅工人嚟講，一杯可以補充到體力嘅飲品相當重要，咁當時就有人諗到，將帶有苦味、提醒、有刺激性嘅咖啡加入去棕紅濃香嘅奶茶入面，點知一試就發現解渴又提神，自此就成為一樣平民化嘅飲品。

雖然係叫做「鴛鴦」（咖啡溝奶茶），但其實都有個比例可以跟下。正宗嘅鴛鴦應該係要7成奶茶加3成咖啡，咁點解叫做「鴛鴦」呢？原來前人就覺得，呢款飲品嘅顏色本身係一深一淺，但就可以好好咁混合埋一齊，情況就好似一雙一對嘅鴛鴦，所以就有呢個叫法喇！