張學良病逝享壽101歲

2001年10月14日，西安事變嘅主角張學良喺夏威夷病逝，享壽101歲。張學良係中國現代史上相當傳奇嘅一個人物，官至陸軍一級上將。

張學良係東北奉系軍閥張作霖嘅長子，祖籍河北大城，自幼就經張作霖教導安排，入讀東三省陸軍講武堂，並且喺入面以砲兵科第一名結業，冇幾耐仲被升為東三省巡閱使衛隊旅旅長，展開佢嘅軍隊生涯。喺佢仍然係奉系軍隊嘅時候，就參與過兩次直奉戰爭，其後經歷皇姑屯事件之後，佢為報父仇、保護國土就決定加入國民革命軍。

喺蔣介石支持之下，佢就執行咗唔少強力嘅政策同埋軍事行動，中東路事件、鎮壓嘎達梅林、鎮壓嘎達梅林都同佢有關。喺1931年日本發動「九一八事變」，張學良當年執行蔣介石嘅不抵抗政策，東北嘅土地好快就落入日軍手上。而去到1936年，張學良就同楊虎城發動西安事變，逼使蔣介石「聯共抗日」。1936年西安事變解決後，佢就被蔣介石父子軟禁長達55年。去到1991年，90歲嘅張學良就終於重獲自由，自此之後佢就去到夏威夷定居。